سەقز؛ دەستبەسەرکرانی ئایدا قادری، وەرزشوان و ڕاهێنەری مەلەوانی لە لایەن هێزە حکومەتییەکانەوە

دووشەممە ٥ی۱٠ی۲٠۲٦

ئایدا قادری، هاووڵاتیی تەمەن ٢٠ ساڵی کورد، وەرزشوان، ڕاهێنەری مەلەوانی و خەڵکی شاری سەقز، لە ئەنجامی هێرشی هێزەکانی ئیدارەی ئیتلاعات دەستبەسەر کرا و بۆ شوێنێکی نادیار گواسترایەوە.

بەپێی ڕاپۆرتی گەیشتوو بە ڕێکخراوەکانی مافی مرۆڤ، ڕۆژی یەکشەممە ٤ی۱٠ی۲٠۲٦، ئایدا قادری، تەمەن ٢٠ ساڵ، ڕاهێنەری وەرزشی مەلەوانی و وەرزشوانی خەڵکی شاری سەقز لە ئەنجامی هێرشی هێزەکانی ئیدارەی ئیتلاعات بۆ سەر ماڵی بنەماڵەکەی بەبێ نیشاندانی هیچ بەڵگەیەکی دادوەری دەستبەسەر کرا و بۆ شوێنێکی نادیار گواسترایەوە.

هەتا کاتی داڕشتنی ئەم ڕاپۆرتە، زانیارییەکی ورد لەسەر هۆکارەکانی دەستبەسەرکران، ئەو تۆمەتانەی دراونەتە پاڵ ئەو هاووڵاتییە و شوێنی ڕاگرتنی ناوبراو لەبەر دەستدا نییە.

بە پشتبەستن بە ئامارە تۆمارکراوەکان لە ناوەندی ئامار و بەڵگەنامەکانی ڕێکخراوەکانی مافی مرۆڤ، لە ماوەی مانگی سێپتەمبەری ئەمساڵدا لانی کەم ١٧ ژن لە ئێران دەستبەسەر کراون کە ٧ کەس لەوان لە هاووڵاتییانی کورد بوون.