کامێران؛ دەستبەسەرکرانی یاسر حوسێنی و موحسین ئەسەدی لەلایەن هێزەکانی ئیدارەی ئیتلاعاتەوە

پێنجشەممە، ١٧ی ۹ی ٢٠٢٦

کامێران؛ دەستبەسەرکرانی یاسر حوسێنی و موحسین ئەسەدی لەلایەن هێزەکانی ئیدارەی ئیتلاعات

یاسر حوسێنی و موحسین ئەسەدی، دوو هاووڵاتیی کورد و خەڵکی کامێران، لەلایەن هێزەکانی ئیدارەی ئیتلاعاتەوە دەستبەسەر کراون و بۆ شوێنێکی نادیار گواستراونەتەوە.

بەپێی ڕاپۆرتی گەیشتوو بە ڕێکخراوەکانی مافی مرۆڤ، دوانیوەڕۆی ڕۆژی پێنجشەممە، ١٧ی ۹ی ٢٠٢٦، موحسین ئەسەدی، هاووڵاتییەکی ٣٥ ساڵە و خەڵکی شاری کامێران، لەلایەن هێزەکانی ئیدارەی ئیتلاعاتەوە دەستبەسەر کراوە. ناوبراو خێزاندار و باوکی دوو منداڵە.

هاوکات، هێزەکانی ئیدارەی ئیتلاعات بە بەکارهێنانی توندوتیژی، یاسر حوسێنی، هاووڵاتییەکی ٢٨ ساڵە، خەڵکی گوندی لۆن و دانیشتووی کامێران،یان دەستبەسەر کردووە.

بەپێی وتەی سەرچاوەیەکی ئاگادار، چەند کەس لە هێزەکانی ئیدارەی ئیتلاعات بە ئۆتۆمبێلی کەسییەوە هەڵیانکوتووەتە سەر دۆکانی کەلوپەلی ناوماڵی یاسر حوسێنی لە گۆڕەپانی شافێعیی کامێران و بێ ئەوەی هیچ بڕیارێکی دادوەرییان پیشان بدەن، ناوبراویان دەستبەسەر کردووە و بۆ شوێنێکی نادیار گواستووەتەوە.

تا کاتی بڵاوکردنەوەی ئەم ڕاپۆرتە، زانیارییەکی ورد لەسەر هۆکاری دەستبەسەرکردن، تۆمەتە پێوەکراوەکان و شوێنی ڕاگرتنی یاسر حوسێنی و موحسین ئەسەدی لە بەردەستدا نییە.