قەزوێن؛ سەعید ئیجادی هاووڵاتیی کورد و لە دەستبەسەرکراوانی بزووتنەوەی «ژن، ژیان، ئازادی» سزای ۲۱ ساڵ بەندکرانی بەسەردا سەپا

قەزوین؛ سەعید ئیجادی، هاووڵاتیی کورد و لە دەستبەسەرکراوانی بزووتنەوەی «ژن، ژیان، ئازادی»، بە سەرجەم ٢١ ساڵ بەندکران سزا درا

شەممە، ٢٤ی ۱٠ی ٢٠٢٦

سەعید ئیجادی، هاووڵاتییەکی کوردی تەمەن ٣٧ ساڵ، خەڵکی سونقوڕ و کولیایی و یەکێک لە دەستبەسەرکراوانی بزووتنەوەی «ژن، ژیان، ئازادی»، لەلایەن لقی یەکەمی دادگای شۆڕشی قەزوین، بە سەرۆکایەتیی دادوەر ئەسەدی، بە کۆی ٢١ ساڵ بەندکران و سزای تەواوکەر سزا  دراوە.

بەپێی ڕاپۆرتە گەیشتووەکان بە ڕێکخراوەکانی مافی مرۆڤ، لەم دواییانەدا دادگای شۆڕشی قەزوین لە چوارچێوەی دۆسیەیەکدا بە ناوی «لاوانی شۆڕشگێڕی قەزوین»، سەعید ئیجادی بە چەند تۆمەتێک سزا دراوە؛ لەوانە، بە تۆمەتی «بەشداریکردن لە سووتاندنی موڵکی گشتی» بە ١٠ ساڵ، بە تۆمەتی «کۆبوونەوە و پیلانگێڕی بۆ ئەنجامدانی تاوان دژی ئاسایشی ناوخۆ» بە ٥ ساڵ، بە تۆمەتی «ئەندامبوون لە گرووپە دژبەرەکانی نیزام» بە ٥ ساڵ و بە تۆمەتی «چالاکیی تەبلیغی دژی نیزام» بە یەک ساڵ بەندکران.

هەروەها، لە بەشێکی دیکەی حوکمەکەدا، دوو ساڵ قەدەغەکردنی چالاکی لە تۆڕە کۆمەڵایەتییەکان و دوو ساڵ قەدەغەکردنی دەرچوون لە وڵات وەک سزای تەواوکەر بەسەریدا سەپێنراوە.

بەپێی یاسای کۆکردنەوەی سزاکان، تەنها قورسترین سزای سەعید ئیجادی، واتە ١٠ ساڵ بەندکران، جێبەجێ دەکرێت. حوکمەکەی ناوبراو ئێستا لە قۆناغی پێداچوونەوە لە دیوانی باڵای وڵاتدایە.

سەعید ئیجادی، تەمەن ٣٧ ساڵ و خەڵکی سونقوڕ، سەر بە پارێزگای کرماشان، دوای نزیکەی ساڵێک ژیانی نهێنی، لە ساڵی ٢٠٢٤دا، لە ئەنجامی هێرشێکی توندوتیژانە و لەگەڵ لێدان و کۆتانی توند، دەستبەسەر کراوە.

بەپێی زانیارییەکان، بارودۆخی جەستەییی ناوبراو دوای دەستبەسەرکردنەکە تا ئەو ڕادەیە خراپ بووە کە بەرپرسانی بەندیخانەی چووبیندەری قەزوین لە سەرەتادا لە وەرگرتنی ئەو خۆیان بواردووە.

هەروەها، لە ماوەی لێکۆڵینەوەکاندا، سەعید ئیجادی لەژێر ئەشکەنجەی جەستەیی و دەروونی ناچار بە دانپێدانانی زۆرەملێ کراوە. لە کۆتاییدا، دوای نزیکەی ساڵێک لە دەستبەسەریی کاتی، بە دانانی بارمتەی دوو ملیار تمەن و تا کاتی دەرچوونی بڕیاری کۆتایی دادگا، بە شێوەی کاتی ئازاد کراوە.