دەستبەسەرکردنی محەممەد ئیبراهیم‌کیا و ئەرکان ئەحمەدی لەلایەن هێزە حکوومەتییەکانەوە لە شارەکانی شنۆ و مەریوان

پێنجشەممە، ٣ی۹ی ٢٠٢٦

دەستبەسەرکردنی محەممەد ئیبراهیم‌کیا و ئەرکان ئەحمەدی لەلایەن هێزە حکوومەتییەکانەوە لە شنۆ و مەریوان

لە ماوەی ڕۆژانی ڕابردوودا، دوو هاووڵاتیی کورد بە ناوەکانی محەممەد ئیبراهیم‌کیا، خەڵکی شنۆ، و ئەرکان ئەحمەدی، خەڵکی مەریوان، لەلایەن هێزەکانی ئیدارەی ئیتڵاعاتەوە دەستبەسەر کراون و بۆ شوێنێکی نادیار گواستراونەتەوە.

بەپێی ڕاپۆرتی ڕێکخراوەکانی مافی مرۆڤ، ڕۆژی چوارشەممە ٢ی ۹ی٢٠٢٦، محەممەد ئیبراهیم‌کیا لەلایەن هێزەکانی ئیدارەی ئیتڵاعاتەوە لە شاری شنۆ دەستبەسەر کراوە.

لە لایەکی دیکەوە، ڕۆژی سێشەممە ١ی ۹ی ٢٠٢٦، هێزەکانی ئیدارەی ئیتڵاعات بە هەڵکوتنە سەر ماڵی بنەماڵەیی ئەرکان ئەحمەدی لە مەریوان، ناوبراویان دەستبەسەر کردووە. ئەرکان ئەحمەدی خەڵکی گوندی هەنگەژاڵ و دانیشتووی مەریوانە.

بەپێی وتەی سەرچاوە ئاگادارەکان، دەستبەسەرکردنی ئەم دوو هاووڵاتییە بە بەکارهێنانی توندوتیژی و بەبێ پیشاندانی هیچ بەڵگەیەکی دادوەری ئەنجام دراوە.

تا کاتی بڵاوکردنەوەی ئەم هەواڵە، هیچ زانیارییەکی ورد سەبارەت بە هۆکاری دەستبەسەرکردن، تۆمەتە پاڵدراوەکان، بارودۆخی تەندروستی و شوێنی ڕاگرتنی ئەم دوو هاووڵاتییە لەبەردەست نییە. هەروەها، بەدواداچوونی بنەماڵەکانیان بۆ وەرگرتنی زانیاری لەسەر چارەنووسیان، تا ئێستا بێئەنجام ماوەتەوە.