بەندیخانەی ئیلام؛ بەردەوامبوونی دەستبەسەرکرانی ئەمیر پەرویززادە هاووڵاتیی کورد و خەڵکی بەدرە

بەندیخانەی ئیلام؛ بەردەوامبوونی دەستبەسەرکرانی ئەمیر پەرویززادە، هاووڵاتیی کورد و خەڵکی بەدرە

شەممە،۲٤ی ۱٠ی ٢٠٢٦

هاووڵاتیی کورد، ئەمیر پەرویززادە، خەڵکی شاری بەدرە لە پارێزگای ئیلام، دوای تێپەڕبوونی نزیکەی مانگێک بەسەر دەستبەسەرکرانیدا، هێشتا لە بەندیخانەی ناوەندیی ئیلام بەندە و چارەنووسی نادیارە. ناوبراو لە مافی دەستڕاگەیشتن بە پارێزەر، سەردانی بنەماڵە و پەیوەندیی تەلەفۆنی لەگەڵیان، هەروەها دەرکردنی بڕیاری بارمتە بۆ ئازادکردنی کاتی، بێبەش کراوە.

بەپێی ڕاپۆرتە گەیشتووەکان بە ڕێکخراوەکانی مافی مرۆڤ، ڕۆژی سێشەممە، ٢٩ی۹ی ٢٠٢٦، هێزەکانی ئیتلاعاتی سپای پاسداران، بەبێ پیشاندانی هیچ بڕیارێکی دادوەری، ئەمیر پەرویززادەیان لە شاری بەدرە دەستبەسەر کردووە.

بەگوێرەی زانیاریی سەرچاوە ئاگادارەکان، هێزەکانی ئیتلاعاتی سپای پاسداران لە کاتی دەستبەسەرکردنەکەدا، بەبێ مۆڵەتی یاسایی، کەلوپەلە کەسییەکانی ئەمیر پەرویززادە، لەوانە مۆبایلەکەی، دەستیان بەسەردا گرتووە.

هەروەها، ڕێکخراوەکانی مافی مرۆڤ ئاگاداریان لەوە پەیدا کردووە کە ئەم هاووڵاتییە کوردە، دوای ماوەیەک لە دەستبەسەرکران و لێپرسینەوە لەژێر گوشار و ئەشکەنجەی توندی جەستەیی و دەروونی، بە مەبەستی وەرگرتنی دانپێدانانی زۆرەملێ، لە یەکێک لە شوێنەکانی لێپرسینەوەی ئیتلاعاتی سپای پاسداران لە بەدرە، بۆ بەندیخانەی ناوەندیی ئیلام گواستراوەتەوە.

تا کاتی بڵاوکردنەوەی ئەم ڕاپۆرتە، هۆکارەکانی دەستبەسەرکردن و تۆمەتە پێوەندیدارەکان بە ئەمیر پەرویززادەوە هێشتا ڕوون نەکراونەتەوە. هەروەها، بەرپرسانی دادوەری و ئەمنییەتی لە دانی زانیارییەکی ڕوون سەبارەت بە دۆخی ناوبراو و یەکلاییکردنەوەی دۆسیەکەی خۆیان لاداوە.