دەستبەسەرکرانی ڕەزا تیج و عەلی مورادیان دوو هاووڵاتیی کورد و خەڵکی شاری بەدرە لە پارێزگای ئیلام

بەدرە؛ دەستبەسەرکردنی ڕەزا تیج و عەلی مورادیان، دوو هاووڵاتیی کورد، لەلایەن هێزە حکوومەتییەکانەوە

دوو هاووڵاتیی کورد و خەڵکی شاری بەدرە، سەر بە پارێزگای ئیلام، بە ناوەکانی ڕەزا تیج، تەمەن ٢٣ ساڵ و یەکێک لە دەستبەسەرکراوانی ناڕەزایەتییەکانی  مانگی ۱۲ ی٢٠۲٥، و عەلی مورادیان، لەلایەن هێزە حکوومەتییەکانەوە دەستبەسەر کراون. دوای تێپەڕبوونی چەندین ڕۆژ، هێشتا هیچ زانیارییەکی ورد لەبارەی چارەنووس و شوێنی ڕاگرتنیان لەبەردەستدا نییە.

بەپێی ڕاپۆرتەکانی گەیشتوو بە ڕێکخراوەکانی مافی مرۆڤ، سەرلەبەیانیی ڕۆژی چوارشەممە ٢١ی ۱٠ی ٢٠٢٦، ڕەزا تیج، هاووڵاتییەکی کوردی تەمەن ٢٣ ساڵ و خەڵکی گوندی «پاکەلگڕاب»ی سەر بە شاری بەدرە، لە ئەنجامی هێرشی هێزەکانی ئیدارەی ئیتلاعات بۆ سەر ماڵی بنەماڵەکەی، بەبێ پیشاندانی بڕیاری دادوەری دەستبەسەر کرا و بۆ شوێنێکی نادیار گواسترایەوە.

ڕەزا تیج پێشتر، لە ڕەوتی ناڕەزایەتییە سەراسەرییەکانی مانگی ۱۲ ی۲٠۲٥دا، لە ڕێکەوتی ٢٤ی ۱۲ی ۲٠۲٥ دەستبەسەر کرابوو و دوای ماوەیەک بە شێوەی کاتی ئازاد کرابوو.

لە لایەکی دیکەوە، ڕۆژی دووشەممە ١٩ی۱٠ی ٢٠٢٦، عەلی مورادیان، هاووڵاتییەکی کورد و خەڵکی گوندی «بانەڵان»ی سەر بە شاری بەدرە، لەلایەن هێزەکانی ئیتلاعاتی سوپای پاسدارانەوە، بەبێ پیشاندانی بڕیاری دادوەری دەستبەسەر کرا و بۆ شوێنێکی نادیار گواسترایەوە.

سەرەڕای بەدواداچوونی بەردەوامی بنەماڵەکانی ئەم دوو هاووڵاتییە، تا ئێستا هیچ زانیارییەکی پشتڕاستکراوە لەبارەی تۆمەتە وەپاڵدراوەکان، شوێنی ڕاگرتن و چارەنووسیان لەبەردەستدا نییە. هەروەها، هەوڵەکانی بنەماڵەکانیان بۆ بەدەستهێنانی زانیاری لەم بارەیەوە تا ئێستا بێئەنجام ماوەتەوە.