مەریوان؛ دەستبەسەرکرانی خەبات فەدایی، هونەرمەندی کورد و لە دەستبەسەرکراوانی بزووتنەوەی ژن ژیان ئازادی

سێشەممە، ٨ی۹ی ٢٠٢٦

خەبات فەدایی، هونەرمەندی کورد و خەڵکی گوندی «بۆڕیەر»ی سەربە سەوڵاوا، لە دەستبەسەرکراوانی بزووتنەوەی «ژن، ژیان، ئازادی»، لەبەردەم ماڵی خۆیدا لە شاری مەریوان لەلایەن هێزە ئەمنییەکانەوە بە توندوتیژییەوە دەستبەسەر کرا و بۆ شوێنێکی نادیار گواسترایەوە.

بەپێی ڕاپۆرتی ڕێکخراوەکانی مافی مرۆڤ، ئێوارەی ڕۆژی سێشەممە، ٨ی۹ی ٢٠٢٦، هێزە حکوومییەکان بێ پێشاندانی هیچ بڕیارێکی دادوەری، ئەم هونەرمەندە کوردەیان لە بەردەم ماڵەکەیدا دەستبەسەر کردووە.

تا کاتی ئامادەکردنی ئەم ڕاپۆرتە، هیچ زانیارییەک لەسەر هۆکاری دەستبەسەرکردنی نوێ و شوێنی ڕاگرتنی لەبەردەستدا نییە.

خەبات فەدایی پێشتریش لە ڕەوتی بزووتنەوەی «ژن، ژیان، ئازادی»دا لە ڕێکەوتی ٢٤ی۹ی ٢٠٢٢ لەلایەن هێزە ئەمنییەکانەوە لە تاران ڕفێندرابوو؛ دوای تەواوبوونی قۆناغەکانی لێکۆڵینەوەش ڕەوانەی بەندیخانەی ئەڤین کرا و سەرەنجام لە ١٤ی۱۱ی ٢٠٢٢ بە دانانی بارمتە بەشێوەی کاتی ئازاد کرا.

دواتر لەلایەن لقی یەکەمی دادگای شۆڕشی وەرامین بە سەرۆکایەتی دادوەر «ئەشکان ڕامش»، بە تۆمەتی «چالاکی پڕوپاگەندەیی دژی کۆماری ئیسلامی» سزای ١ ساڵ بەندکردن و بە تۆمەتی «ئەندامێتی لە گرووپەکان بە مەبەستی تێکدانی ئاسایشی وڵات» سزای ٥ ساڵ بەندکردنی تەعزیریی بەسەردا سەپێندرا.