مەریوان؛ دەستبەسەرکرانی پێنج هاووڵاتیی کورد لەلایەن هێزە حکوومەتییەکانەوە

مەریوان؛ دەستبەسەرکردنی پێنج هاووڵاتیی کورد لەلایەن هێزە حکوومەتییەکانەوە

شەممە، ٢٩ی ۸ی ٢٠٢٦

لانی کەم پێنج هاووڵاتیی کورد و خەڵکی گوندی «سەردۆش»ی سەر بە شاری مەریوان، بە ناوەکانی ئازاد نەورۆزی، زانیار توانا، پوویا کاکەمحەممەدی، زانیار قادری و شێرزاد عەبدی، لەلایەن هێزە حکوومەتییەکانەوە دەستبەسەر کران و بۆ شوێنێکی نادیار گواسترایەوە.

بەپێی ڕاپۆرتێکی گەیشتوو بە ڕێکخراوەکانی مافی مرۆڤ، بەرەبەیانی ڕۆژی شەممە، ٢٩ی ۸ی٢٠٢٦، هێزەکانی ئیدارەی ئیتلاعات بە هێرشکردنە سەر گوندی «سەردۆش»ی سەر بە مەریوان، لانی کەم ئەم پێنج هاووڵاتییەیان دەستبەسەر کردووە.

بەپێی وتەی سەرچاوەکانی ڕێکخراوەکانی مافی مرۆڤ، دەوروبەری کاتژمێر ٥ی بەیانیی ئەمڕۆ، هێزەکانی ئیدارەی ئیتلاعات بە چەندین ئۆتۆمبێلی هەڵگری هێزی چەکدارەوە هێرشیان کردووەتە سەر گوندی سەردۆش و بەبێ پیشاندانی هیچ جۆرە بەڵگەیەکی دادوەری، ئەم پێنج هاووڵاتییەیان بە شێوەیەکی توندوتیژانە و سەرەڕۆیانە دەستبەسەر کردووە.

تا کاتی بڵاوکردنەوەی ئەم هەواڵە، زانیارییەکی ورد لەبارەی هۆکارەکانی دەستبەسەرکردن، تۆمەتە پاڵپێدراوەکان، چارەنووس و شوێنی ڕاگرتنی ئەم پێنج هاووڵاتییە کوردە لەبەردەستدا نییە.