دەستبەسەرکرانی شاهین مستەفازادە و پژمان ئەمانی لە شارەکانی مهاباد و سەقز

پێنجشەممە، ٢٤ی ۹ی٢٠٢٦

دەستبەسەرکرانی شاهین مستەفازادە و پژمان ئەمانی لە مهاباد و سەقز

دوو هاووڵاتیی کورد بە ناوەکانی شاهین مستەفازادە، تەمەن ٣٧ ساڵ و خەڵکی مهاباد، و پژمان ئەمانی، تەمەن ١٨ ساڵ و خەڵکی سەقز، لەلایەن هێزەکانی ئیدارەی ئیتلاعاتەوە دەستبەسەر کراون و بۆ شوێنێکی نادیار گواستراونەتەوە.

بەپێی ڕاپۆرتی گەیشتوو بە ڕێکخراوەکانی مافی مرۆڤ، ڕۆژی چوارشەممە، ٢٣ی ۹ی ٢٠٢٦، پژمان ئەمانی، گەنجی ١٨ ساڵ و خەڵکی سەقز، لە ڕەوتی هەڵکوتنی هێزەکانی ئیدارەی ئیتلاعات بۆ سەر ماڵی بنەماڵەکەی، بەبێ پیشاندانی هیچ بڕیارێکی دادوەری، دەستبەسەر کرا.

بەپێی وتەی سەرچاوە نزیکەکان، هێزەکانی ئیدارەی ئیتلاعات لە کاتی هەڵکوتنەکەدا، سەرجەم مۆبایلەکانی پژمان ئەمانی و ئەندامانی دیکەی بنەماڵەکەی، لەوانە باوک، دایک و براکەی، دەستیان بەسەردا گرتووە و لەگەڵ خۆیان بردوویانە.

هەروەها، لە هەمان ڕۆژدا، شاهین مستەفازادە، تەمەن ٣٧ ساڵ و خەڵکی مهاباد، لەلایەن هێزەکانی ئیدارەی ئیتلاعاتەوە و لە ڕەوتی هەڵکوتن بۆ سەر ماڵی بنەماڵەکەی، دەستبەسەر کرا.

تا کاتی بڵاوکردنەوەی ئەم هەواڵە، زانیارییەکی ورد لەبارەی هۆکاری دەستبەسەرکردنی ئەم دوو هاووڵاتییە، تۆمەتە پێیان‌دراوەکان، شوێنی ڕاگرتن و چارەنووسیان لەبەردەستدا نییە.