ڕاپۆرتێک لەسەر دەستبەسەرکردن و ناڕوونیی چارەنووسی ڕامین مەحموودی

ڕامین مەحموودی هاووڵاتیی کورد و خەڵکی کامێران،  لە سێ ڕۆژ پێشترەوە لەلایەن هێزە حکوومەتییەکانی کۆماری ئیسلامیی ئێرانەوە دەستبەسەرکراوە و بۆ شوێنێکی نادیار گواستراوەتەوە و تا ئێستا هیچ زانیارییەک لەسەر چارەنووسی لەبەردەستدا نییە.

بەپێی ڕاپۆرتی گەیشتوو بە ڕێکخراوەکانی مافی مرۆڤ ڕۆژی دووشەممە (٢٠/۷/۲٠۲٦)، ڕامین مەحموودی تەمەن ٣٢ ساڵ و خەڵکی گوندی "ئەڵک"ی سەر بە شاری کامێران، لەلایەن هێزەکانی ئیدارەی ئیتڵاعاتەوە دەستبەسەرکراوە و بۆ شوێنێکی نادیار گواستراوەتەوە.

بەوتەی سەرچاوە ئاگادارەکان، بەدواداچوونی بنەماڵەی ئەم هاووڵاتییە بە مەبەستی ئاگاداربوونەوە لە  باری تەندروستیی ناوبراو تا ئێستا بێئاکام ماوەتەوە.

ئەم هاووڵاتییە لە ڕێکەوتی  (۱۱/۱٠/ ٢٠٢٥) بە بەکارهێنانی توندوتیژیی زۆر و لێدان لە کامیاران دەستبەسەرکرابوو و بۆ یەکێک لە دەستبەسەرگەکانی وەزارەتی ئیتڵاعاتی کۆماری ئیسلامیی ئێران لە سنە گواستراوەتەوە.

هەروەها، پێشتریش لەلایەن وەزارەتی ئیتڵاعاتەوە دەستبەسەرکرابوو و دوای ماوەیەک بە دانانی بارمتەی دوو ملیار تۆمانی بە شێوەیەکی کاتی و تا کۆتایی هاتنی قۆناغەکانی دادگاییکردن لە بەندیخانە ئازاد کرابوو.

ڕامین مەحموودی بۆ ماوەیەک لە هەرێمی کوردستان ئەندامی حیزبی کۆمەڵە بووە و دوای جیا بوانەوە لەو حیزبە، گەڕابووەوە بۆ زێدی خۆی.

تا کاتی دارشتنی ئەم ڕاپۆرتە، زانیارییەکی ورد لەسەر هۆکارەکانی دەستبەسەرکردن، تۆمەتە پاڵدراوەکان، شوێنی ڕاگرتنی ئەم هاووڵاتییە لەبەردەستدا نییە.